Studentët që prej më shumë se 150 ditësh protestojnë kundër qeverisë kanë njoftuar ndryshimin e strategjisë së organizimit. Ata do të zhvillojnë protesta kombëtare dy herë në javë, çdo të mërkurë dhe të shtunë, në orën 14:00.
Protesta e radhës është njoftuar për të shtunën, më 7 nëntor, përpara Ministrisë së Arsimit.
Në deklaratën e tyre, studentët bëjnë të ditur se kërkesa kryesore mbetet dorëheqja e kryeministrit Edi Rama. Ata akuzojnë qeverinë se deri më tani ka injoruar kërkesat e protestuesve.
Sipas tyre, ndryshimi i strategjisë synon të ruajë angazhimin dhe intensitetin e protestave, duke u dhënë studentëve dhe mbështetësve mundësinë të vijojnë mobilizimin.
Grupimi “Studentët në protestë” ka deklaruar gjithashtu se do të mbështesë edhe protestat e tjera qytetare kundër qeverisë, pavarësisht se kur organizohen.
“Lufta e shqiptarëve për demokraci vazhdon. Autokracia do të bjerë, ashtu siç ra edhe diktatura”, thuhet në deklaratë.
