Sindikata e Punonjësve të Universiteteve të Shqipërisë (SPUSH) ka vendosur të ndërpresë procesin mësimor në të gjitha universitetet publike të vendit, në shenjë solidariteti me studentët dhe nxënësit që prej muajsh janë përfshirë në protesta.
Vendimi është miratuar unanimisht nga kryesia e sindikatës më 20 tetor dhe ka hyrë në fuqi më 21 tetor. Bojkoti do të vijojë pa një afat të përcaktuar përfundimi, deri në një njoftim të ri nga sindikata.
Në arsyetimin e saj, SPUSH thekson se protestat e studentëve lidhen me kërkesat për përmirësimin e cilësisë së arsimit, një sistem shëndetësor dinjitoz, garantimin e sigurisë së jetës dhe pronës, si dhe rritjen e përgjegjshmërisë së institucioneve. Sipas sindikatës, mungesa e dialogut dhe përdorimi i dhunës ndaj protestuesve, veçanërisht që prej 13 tetorit, e bëjnë të pamundur vijimin normal të mësimit.
Përfaqësuesit e pedagogëve shprehen se nuk mund të zhvillojnë mësim sikur asgjë të mos ketë ndodhur, ndërsa studentët e tyre përballen me dhunën në rrugë. Ata nënvizojnë gjithashtu se ndajnë me studentët shqetësimet për zhvillimet politike dhe ekonomike në vend, korrupsionin dhe mungesën e meritokracisë.
Në kuadër të këtij vendimi, sindikata i kërkon institucioneve përgjegjëse të ndalojnë menjëherë dhunën ndaj studentëve dhe protestuesve paqësorë, të garantojnë një hetim të pavarur e transparent për përdorimin e forcës dhe të vënë para përgjegjësisë personat që kanë urdhëruar apo ushtruar dhunë. Gjithashtu, ajo kërkon trajtim të ligjshëm dhe dinjitoz për studentët e shoqëruar nga policia, si dhe marrjen parasysh të kërkesave të të rinjve që protestojnë.
SPUSH u ka bërë thirrje rektorëve dhe drejtuesve të universiteteve publike që të respektojnë vendimin e bojkotit dhe të mos ndërmarrin masa disiplinore ndaj pedagogëve apo studentëve që marrin pjesë në protestë.
Përveç ndërprerjes së mësimit, pedagogët do t’i bashkohen edhe protestave në mbështetje të studentëve. Sipas planit të njoftuar nga sindikata, ata do të mblidhen çdo ditë në orën 10:00 përpara Korpusit Qendror të Universitetit Politeknik të Tiranës.
Sindikata sqaron se orët mësimore të humbura gjatë bojkotit do të zëvendësohen në një moment të mëvonshëm. Ndërkohë, pedagogëve u kërkohet të ruajnë komunikimin me studentët dhe t’u ofrojnë materialet mësimore të nevojshme gjatë kësaj periudhe.
SPUSH nënvizon se vendimi nuk përbën braktisje të procesit akademik, por një qëndrim në mbështetje të studentëve dhe kërkesave të tyre. Rikthimi në auditorë, sipas sindikatës, do të bëhet pasi protestuesit të marrin një përgjigje ndaj shqetësimeve dhe kërkesave të ngritura prej tyre.