Inteligjenca amerikane heton kërcënimin: A po planifikon Irani sulme në SHBA?

Shërbimet amerikane të inteligjencës kanë zbuluar informacione që sugjerojnë se Irani po shqyrton mundësinë e kryerjes së sulmeve në territorin amerikan, duke përdorur bomba me materiale radioaktive ose armë kimike.

Sipas shtatë zyrtarëve amerikanë të cituar nga CNN, objektiva të mundshëm mund të jenë edhe zyrtarë të lartë të administratës së presidentit Donald Trump në Uashington. Megjithatë, autoritetet theksojnë se deri tani bëhet fjalë për plane të mundshme dhe jo për një sulm që pritet të ndodhë së shpejti.

Sipas burimeve, inteligjenca ka siguruar informacione për vende dhe objektiva të mundshëm, duke nxitur autoritetet amerikane të zhvillojnë takime dhe të përgatisin masa parandaluese.

Zëdhënësja e Shtëpisë së Bardhë, Lauren Bis, deklaroi se administrata po monitoron situatën, por theksoi se aktualisht nuk ka kërcënime të besueshme ndaj territorit amerikan.

Një tjetër shqetësim i autoriteteve lidhet me mundësinë që Irani të përdorë persona që jetojnë në SHBA për të organizuar një sulm, pa pasur nevojë të dërgojë agjentë nga jashtë vendit.

Një burim i tha CNN se inteligjenca amerikane ka përgjuar komunikime ku pretendohet se Irani mund të ketë fshehur materiale radioaktive në territorin amerikan. Megjithatë, zyrtarët nuk janë të bindur për vërtetësinë e këtij informacioni.

Bomba e ashtuquajtur “e pistë” nuk është bombë bërthamore. Ajo përmban eksploziv të zakonshëm të kombinuar me materiale radioaktive, të cilat shpërndahen në mjedis pas shpërthimit. Kjo mund të shkaktojë ndotjen e zonës dhe rreziqe për shëndetin e njerëzve.

Shqetësimet amerikane shtrihen edhe në Lindjen e Mesme, ku inteligjenca po shqyrton mundësinë që Irani të përdorë armë kimike kundër trupave amerikane të vendosura në rajon. Për këtë arsye, po përgatiten masa shtesë për mbrojtjen e ushtarëve dhe personelit diplomatik.

Ndërkohë, përfaqësia e Iranit në Kombet e Bashkuara ka mohuar akuzat për përdorimin e mundshëm të armëve kimike, duke i cilësuar ato si të pavërteta.

Këto zhvillime vijnë në një kohë kur negociatat mes SHBA-së dhe Iranit për t’i dhënë fund konfliktit dhe për të rihapur Ngushticën e Hormuzit nuk kanë sjellë ende një marrëveshje.

Copyright © 2026 Miks News. All rights reserved.