Dy tërmete të fuqishme, të ndodhura brenda më pak se një minute, kanë shkaktuar një katastrofë të jashtëzakonshme në Venezuelë. Ndërkohë që ekipet e shpëtimit kërkojnë ende të mbijetuar nën rrënoja, bilanci i viktimave vazhdon të rritet.
Numri i personave të vdekur është rritur në mbi 589, ndërsa rreth 3,000 të tjerë janë raportuar të plagosur, sipas presidentes në detyrë Delcy Rodríguez.
Tërmetet, me magnitudë 7.2 dhe 7.5, goditën veriun e Venezuelës të mërkurën në mbrëmje, brenda më pak se një minute nga njëri-tjetri. Sipas të dhënave të Shërbimit Gjeologjik të SHBA-së, i dyti ishte tërmeti më i fortë që ka goditur vendin që nga viti 1900.
Zonat më të prekura janë Caracas dhe La Guaira, ku shumë ndërtesa janë shembur dhe kërkimet kanë vazhduar gjatë gjithë natës. Në disa zona, banorët dhe ekipet lokale kanë dëgjuar njerëz që kërkonin ndihmë nga rrënojat.
Ndërkohë, ekipet ndërkombëtare të shpëtimit kanë shkruar në Venezuelë.
Situata në spitale është kritike. Një mjek në La Guaira i tha BBC-së se dy spitalet kryesore të zonës janë “plotësisht të mbingarkuara”, me mungesë të rëndë ilaçesh dhe pajisjesh mjekësore. Sipas tij, strukturat shëndetësore nuk kanë kapacitet për të përballuar numrin e madh të të plagosurve, ndërsa shumë njerëz janë ende të bllokuar nën rrënoja.
Mjekë të tjerë kanë paralajmëruar se tragjedia po ndodh në një vend që prej vitesh përballet me probleme dhe mungesa të thella në sistemin shëndetësor, çka e bën gjendjen edhe më të vështirë.
BBC Verify raportoi se dëmet e mëdha në qytetet bregdetare, edhe më shumë se 160 kilometra larg.Të dy tërmetet kanë qenë relativisht të cekëta, më pak se 30 kilometra nën sipërfaqe, gjë që mund ta rrisë ndjeshëm fuqinë e lëkundjeve dhe dëmet në sipërfaqe.
Në La Guaira, pamjet satelitore tregojnë ndërtesa shumëkatëshe të rrëzuara, rrugë të bllokuara nga rrënojat dhe zona të tëra të dëmtuara rëndë.
Banorët kanë përshkruar skena kaotike, mungesë komunikimi dhe përpjekje të dëshpëruara për të kontaktuar familjarët.
Një dëshmitar, i cili ndodhej me familjen në La Guaira kur ndodhën tërmetet, tha për BBC se lëkundjet ishin “jashtëzakonisht të forta” dhe se rrugët ishin të mbushura me rrënoja. Ai tha se në disa zona nuk kishte ekipe të menjëhershme emergjence dhe se banorët po përpiqeshin vetë të nxirrnin njerëzit nga ndërtesat e shembura.
Në një vend që tashmë përballet me pasiguri politike, krizë ekonomike dhe infrastrukturë të dobësuar, tërmetet përbëjnë një goditje të rëndë. Për momentin, prioritet mbetet kërkimi i të mbijetuarve, trajtimi i të plagosurve dhe dërgimi i ndihmave në zonat më të prekura.
Burimet: Guardian, BBC