Presidenti ukrainas Volodymir Zelenski ka akuzuar homologun rus Vladimir Putin se ka frikë nga negociatat për t’i dhënë fund luftës.
Deklaratat e presidentit ukranas vijnë pasi shefi i Kremlinit përjashtoi mundësinë e bisedimeve të drejtëpërdrejta me Zelenskin.
“Putin konfirmoi edhe një herë se ai ka frikë nga negociatat, ka frikë nga liderët e fortë dhe bën gjithçka që është e mundur për të zgjatur luftën”, tha Zelensky.
Putin refuzoi takimin me Zelenskin pasi e quan atë të paligjshëm për shkak të mos mbajtjeve të zgjedhjeve në vend. Ukraina është aktualisht nën ligjin ushtarak për shkak të luftës, dhe sipas kushtetutës nuk lejohet të oranizohen zgjedhje.
Që prej rikthimit të Donald Trump, Ukraina ka paralajmëruar që të mos përjashtohet nga asnjë nga bisedimet që lidhen me paqen midis Rusisë dhe SHBA-së, duke akuzuar Putinin se dëshiron të manipulojë presidentin amerikan.
Ndërkohë, ushtria ukrainase shënjestroi gjatë natës disa objekte të naftës dhe energjisë në pjesët perëndimore të Rusisë. Mediat lokale publikuan pamjet të një zjarri masiv në një rafineri nafte.
Sulme ajrore ka pasur edhe pranë kufirit Rusi-Bjellorusi ku sipas autoriteteve ruse u kapën dronë të cilët synonin një objekt të energjisë bërthamore.
