Kryetari i Bashkisë së Tiranë, Erion Veliaj, ka reaguar nga qelia e paraburgimit, duke thënë se akuzat e SPAK për abuzime me lejet e ndërtimit nuk qëndrojnë. Ai vë në dukje se në asnjë rast marrëdhënia që bashkia ka pasur me biznesmenët për sa i përket punimeve në kryeqytet nuk përbën korrupsion.
“Viktima e Nesti Dados për shkakun tim, që kurrë s’kam dhënë e marrë me të asnjë favor të asnjë natyre, Shkëlqim Fusha, ka paguar dy avokatë. 9 mijë euro! Për punët e tij në Vlorë e Himarë. Por, meqë këto të dyja njihen me avokaten që kam në shtëpi, pra Ajolën, ky është korrupsion, sepse Shkëlqimi ka marrë punë nga bashkia dhe të njohurat e sime shoqeje kanë marrë punë nga Shkëlqimi. Leja e ndërtimit është e drejtë pa konkurrim, pra e merr ai që ka tokën ose kontratën me pronarin e tokës. Olsi Angoni, si pronar ndërtues, e di mirë këtë, ndërsa unë as nuk e di kush është ky Gentian Karaj, që paska bërë shtëpi njëkatëshe në Yrshek, siç nuk di dhe s’kam detyrë të di kush janë pronarët e pafundëm që marrin leje në Bashkinë e Tiranës.”, shkruan Veliaj.
Veliaj merr si shembull në këtë rast edhe vetë godinën e SPAK-ut.
Për shembull, garanci punimesh ka dhënë edhe firma që bëri ndërtesën e UKT-së, të cilën bujarisht ia falëm SPAK-ut, madje thamë hallall se do bëjë punë të mira për drejtësinë e munguar. Tjetër mesele kjo, po ishalla s’është gjithë SPAK-u violinë e prishur, si ky kastraveci që më ra mua për hise, se pastaj i bie që të kemi nxjerrë sytë për të vënë vetulla.
Kryebashkiaku vijon më tej në reagimin e tij duke mohuar të ketë bërë favorizime.
Zotërisë i është dhënë leja për sevapin, haka për punën dhe kusuri për shërbimin. Këto i njeh ligji dhe kodi etik e shoqëror. Ekzaktësisht çfarë nuk njeh Kafka im: Ligjin dhe Kodin Etik, se atë shoqërorin është gjynah t’ia kërkosh një individi të devijuar psiko-emocionalisht, sa nga violina dhe sa nga trampolina. Në vend të hakut, njeh “hakmarrjen” për katet që s’i takonin kur telefononte me atë zërin si violinë në sordinë “o kryetar, si i bahet me atë lejen time?” dhe si kusur ai kupton shërbimet banale me letra anonime!
Veliaj e mbyll duke thënë se ai do të vazhdojë të reagojë për të tjera çështje për të cilat SPAK e akuzon.
