Një 84 vjeçare u nxor e pajetë nga banesa e saj mëngjesin e kësaj të diele në Kuçovë, për shkak të rrjedhjes së gazit nga bombola e gatimit.
E moshuara Alie Kosova nuk mundi të mbijetojë për shkak të shpërthimit të fuqishëm.
Ngjarja ndodhi rreth orës 06:00 në lagjen “11 Janari”. 84 vjeçarja dhe bashkëshorti i saj Mustafa Kosova, 86 vjeç, jetonin të vetëm në banesë. Burri 86-vjeçar u arrit të nxirret në kohë nga forcat zjarrfikëse dhe u dërgua në spitalin e Traumës për të marrë ndihmë mjekësore të specializuar për shkak të plagëve të marra në trup.
Mësohet se forcat zjarrfikëse u lajmëruan nga fëmijët e çiftit, të cilët jetojnë shumë pranë shtëpisë së të moshuarve. Për shkak të shembjes së madhe në banesë, ata e patën të pamundur shpëtimin e 84-vjeçares, e cila kishte mbetur nën rrënoja dhe ishte e paralizuar.
Dyshohet se shkak i zjarrit është bërë rrjedhja e gazit nga bombola e gatimit dhe ndezja e një cigareje nga i moshuari.
