Situata në veri të Kosovës vazhdon të jetë e tensionuar, pas vendosjes së kryetarëve të rinj shqiptarë në objektet komunale të Zveçanit, Zubin Potokut dhe Leposaviqit.
Një sërë tensionesh janë krijuar, ku nuk kanë munguar edhe sulmet ndaj mediave, si atyre kosovare po ashtu dhe shqiptarëve të cilët kanë shkuar në veri të Kosovës për të raportuar në kohë reale atë çfarë është duke ndodhur.
Sipas mediave vendase mësohet se dy persona të maskuar kanë sulmuar ekipin e “Periskopit” sot në Zveçan. Ashtu si dhe shihet nga fotot e siguruara gazetari është me bluze të grisur, por fatmirësisht nuk ka mbetur i lënduar.
Ndërkohë, bëhet me dije se janë sulmuar edhe automjetet e ekipeve të televizioneve shqiptare “Top Channel” dhe “Euroneës”.
Në mjetin e ekipit të Top Channel serbën kanë shkruar simbole nacionaliste serbe e madje iu janë hequr edhe targat.
Protestuesit serbë kanë hedhur edhe bojë të zezë mbi xhamin e përparëm të automjetit. Asociacioni i Gazetarëve të Kosovës, u ka bërë thirrje NATO dhe EULEX, që të sigurojnë gazetarët, si dhe t’u mundësojnë të raportojnë pa u penguar.
