Ministri izraelit i Mbrojtjes, Israel Katz, tha të martën se Izraeli “do të përgjigjet me forcë” pas “shkeljes së plotë” të armëpushimit të shpallur nga Presidenti i SHBA-së, Donald Trump, nga ana e Iranit, duke shtuar se do të “vazhdojë operacionin intensiv për të goditur” Teheranin.
“Unë kam udhëzuar IDF-në (Forcat Mbrojtëse të Izraelit) në koordinim me Kryeministrin që të vazhdojnë operacionin intensiv për të sulmuar Teheranin dhe për të penguar objektivat e regjimit dhe infrastrukturën terroriste në Teheran”, tha ai.
Edhe ministri izraelit i Financave reagoi pas raporteve se ushtria kishte identifikuar raketa të lëshuara nga Irani.
“Teherani do të dridhet”, tha Bezalel Smotrich, një aleat kyç i kryeministrit Benjamin Netanyahu
Ushtria izraelite ka kapur dy raketa të lëshuara nga Irani drejt Izraelit, tha një zyrtar i Forcave të Mbrojtjes së Izraelit për CNN.
Media shtetërore iraniane, sipas BBC, iu përgjigj akuzave të Izraelit, duke thënë se Irani mohon raportet se ka qëlluar një raketë drejt Izraelit pas fillimit të armëpushimit.
