Moti i keq ka goditur Britaninë e Madhe. Reshjet e dendura të dëborës kanë shkaktuar probleme me transportin.
Stacionet e hekurudhave dhe aeroportet kanë punuar me ndërprerje për shkak të kushteve të vështira atmosferike.
Mbi 11 anulime janë në fuqi në stacionin e trenit në Londër Waterloo – kjo për shkak të problemeve me furnizimin me energji elektrike. Ndërkohë Aeroporti i Mançesterit ka rihapur të dyja pistat, pasi i mbylli përkohësisht për disa orë mëngjesin e të dielës.
Po ashtu aeroporti “John Lennon” i Liverpool-it ka rihapur pistën e tij, ndërsa janë paralajmëruar vonesa të fluturimeve. Ndërsa pista e e Aeroportit Leeds Bradford mbetet e mbyllur.
Sakaq dhjetëra miliona amerikanë po përgatiten për një stuhi të madhe dimri që mund të sjellë reshjet më të mëdha të borës dhe temperaturat më të ftohta në më shumë se një dekadë.
Sipas Shërbimit Kombëtar të Motit ,stuhia do të lëvizë në lindje në dy ditët e ardhshme, ndërsa 30 shtete janë nën alarm.
Një gjendje e jashtëzakonshme është shpallur në Kentaki, Virxhinia, Kansas, Arkansas , Misuri dhe pjesë të tjera të Shteteve të Bashkuara të pamësuara me të ftohtin e ekstrem, përfshirë Misisipin dhe Floridan.
Qarkullimi në rrugë është vështirësuar duke shkaktuar përplasje të kamionëve dhe makinave.
