Në prag të mbylljes së vitit, qeveria ka vendosur të shpërblejë me dy paga mujore 38 pjesëtarë të Forcave të Armatosura, Agjencisë Kombëtare të Mbrojtjes Civile, e 7 personel zjarrfikës në Korçë e Devoll, për rezultate të mira gjatë shuarjes së zjarreve brenda dhe jashtë vendit.
Vendimi i publikuar tashmë në Fletoren Zyrtare parashikon shpërblim edhe për 1255 zjarrfikës të pushtetit vendor me një pagë shtesë.
Nga ana tjetër ashtu sikurse u parashikua, në buxhetin e vitit 2023 është shtuar fondi prej 1 mld lekësh në fondin e institucioneve të pavarura, i cili do të përdoret kryesisht për pagën e magjistratit. Ministria e Financave dhe Ekonomisë ka parashikuar që këto para të merren nga fondi i kontigjencës, i miratuar në buxhetin e vitit 2023.
Institucionet që do të përfitojnë para për të përballuar shpenzimet për paga janë Këshilli i Lartë i Prokurorisë, Këshilli i Lartë Gjyqësor, SPAK-u, Inspektorati i Lartë i Drejtësisë, KQZ, e Avokati i Popullit.
