Një vatër e murtajës afrikane të derrave është identifikuar në Malin e Rrencit, në Lezhë, ku janë regjistruar të paktën 10 krerë derrash të ngordhur.
Nga këta, pesë derrat janë gjetur brenda një ferme dhe pesë të tjerë në masivin pyjor të kësaj zone.
Pas identifikimit të këtij rasti, Shërbimi Veterinar në Lezhë ka ndërmarrë masa të menjëhershme. Pas analizave, është konfirmuar se derrat kanë ngordhur nga murtaja afrikane e derrave.
Në bashkëpunim me institucionet e tjera, shërbimi ka asgjësuar derrat e ngordhur në vendin ku janë gjetur dhe ka realizuar dezinfektimin e zonës.
Zona ku është konstatuar vatra e sëmundjes është shpallur “zonë e kuqe”, duke përfshirë një rreth 10 km përreth Malit të Rrencit në Shëngjin.
Gjatë 20 ditëve të ardhshme do të vazhdojë monitorimi i situatës, ndërkohë që autoritetet kërkojnë nga qytetarët dhe kryesisht nga gjahtarët të sinjalizojnë çdo rast të ngordhjes së kafshëve për të parandaluar përhapjen e sëmundjes.
Murtaja afrikane e derrave është një sëmundje që nuk paraqet rrezik për shëndetin e njerëzve, as nga kontakti me derrat e infektuar, as nga konsumimi i mishit të tyre. Megjithatë, ajo ka pasoja të mëdha ekonomike, pasi shkakton ngordhje masive të derrave dhe dëmton fermat, si dhe zinxhirët e furnizimit me mish derri.
