Shtetet e Bashkuara vendosën të premten sanksione ndaj Ministrit të Brendshëm iranian Eskandar Momeni dhe një biznesmeni që thuhet se ndihmoi në pastrimin e parave për Teheranin, ndërsa administrata e Presidentit Donald Trump rrit presionin mbi Republikën Islamike.
Departamenti i Thesarit, duke njoftuar masën, tha se Momeni ishte përgjegjës për një goditje brutale të sigurisë në Iran këtë muaj, ndërsa ai mbikëqyr forcat e zbatimit të ligjit që thuhet se ishin përgjegjëse për vdekjen e mijëra protestuesve paqësorë.
Sakaq, Trump ka lëshuar kërcënime në javët e fundit për të ndërhyrë në Iran për shkak të shtypjes së përgjakshme të protestave dhe ka dërguar anije luftarake në Lindjen e Mesme, edhe pse ka thënë se planifikon të flasë me qeverinë atje.
Sanksionet financiare të së premtes shënjestruan gjithashtu pesë zyrtarë të tjerë iranianë të sigurisë të përfshirë në “shtypjen e dhunshme të popullit iranian”, tha Thesari në një deklaratë.
Sanksione u lëshuan gjithashtu kundër investitorit Babak Zanjani dhe dy bursave të aseteve dixhitale të regjistruara në Britani, të cilat Thesari tha se kishin përpunuar fonde të lidhura me Trupat e Gardës Revolucionare Islamike të Iranit.
Sekretari i Thesarit, Scott Bessent, tha se SHBA-të do të vazhdojnë të synojnë elitat iraniane dhe rrjetet e tyre, të cilët, sipas tij, shfrytëzojnë asetet dixhitale për të shmangur sanksionet dhe për të financuar operacione kiberkriminale.
“Si minjtë në një anije që po fundoset, regjimi po i dërgon me tërbim fondet e vjedhura nga familjet iraniane në banka dhe institucione financiare anembanë botës. Jini të sigurt, Thesari do të veprojë”, tha Bessent në deklaratë.