Një punonjës i operatorit të sistemit të shpërndarjes së energjisë elektrike ka mbetur i plagosur këtë të enjte teksa ndodhej në punë.
Policia e Dibrës njoftoi se shtetasi Adul Duriçi,rreth 50 vjeç, me profesion elektriçist, duke punuar për riparimin e një linje elektrike, dyshohet se ka rënë në kontakt me energjinë elektrike dhe për pasojë ka mbetur i lënduar.
Ngjarja mësohet se ka ndodhur në lagjen “Gjeologu” të qytetit të Bulqizës. Raportohet se 50-vjeçari, është transportuar menjëherë drejt spitalit të Bulqizës, ku u trajtua me asistencë mjekësore”.
Ndërkohë, një orë më vonë ai është dërguar për mjekim më të specializuar në Tiranë. Grupi hetimor po kryen hetimet në vendngjarje dhe po punon për zbardhjen e plotë të rrethanave.
Po ashtu, në vendin e ngjarjes kanë shkuar edhe inspektorët e Inspektoriatit Shtetëror të Punës të cilët do të verifikojnë nëse janë zbatuar si duhet rregullat e sigurimit teknik në punë.
