Izraeli ka “rifilluar me forcë të plotë luftimin” kundër Hamasit në Rripin e Gazës, tha të martën mbrëma kryeministri Benjamin Netanyahu.
Në një deklaratë, ai paralajmëroi se “negociatat do të vazhdojnë vetëm nën zjarr” dhe se “ky është vetëm fillimi”.
Komentet e tij erdhën pasi avionët izraelitë nisën sulme masive ajrore kundër objektivave të Hamasit në Gaza, sipas ushtrisë.
Më shumë se 400 njerëz janë vrarë gjatë sulmeve, tha ministria e Shëndetësisë e drejtuar nga Hamasi, dhe qindra të tjerë u plagosën.
Vala e sulmeve ishte më e rënda që nga fillimi i armëpushimit më 19 janar.
Armëpushimi i brishtë zgjati pak, dhe kjo valë e re sulmesh sugjeron se planet për një fund të përhershëm të luftës mund të jenë ende larg.
Sulmet ajrore që goditën Beit Lahia, Rafah, Nuseirat dhe Al-Mawasi të martën shkatërruan paqen relative që banorët e Gazës kishin përjetuar që nga janari dhe spitalet u mbushën sërish me viktima.
Sulmet në Gaza janë dënuar nga Egjipti, një ndërmjetës në bisedime.
Sulmet ajrore janë “një shkelje e hapur” e marrëveshjes së armëpushimit dhe përfaqësojnë “një përshkallëzim të rrezikshëm”, tha Tamim Khallaf, zëdhënësi i Ministrisë së Punëve të Jashtme të vendit.
“Unë u trondita që lufta filloi përsëri, por në të njëjtën kohë, kjo është ajo që ne presim nga izraelitët,” tha Hael një banor nga Jabalia al-Balad për BBC Arabic.
“Si qytetar jam i rraskapitur. Na mjaftoi një vit e gjysmë deri këtu! Mjaft”, shtoi ai.
Figura kryesore të Hamasit u vranë në sulmet ajrore, duke përfshirë gjeneralmajor Mahmoud Abu Watfa, zëvendësministër i brendshëm në Gaza dhe zyrtari më i lartë i sigurisë i Hamasit.
Në fjalimin e tij, Netanyahu tha se Izraeli ishte përpjekur të negocionte me Hamasin për të liruar pengjet izraelitë që ende mbahen në Gaza. Ai akuzoi Hamasin për refuzimin e propozimeve çdo herë.
Izraeli dhe Hamasi nuk kanë rënë dakord se si të çojnë përpara marrëveshjen e armëpushimit që nga skadimi i fazës së parë në fillim të marsit, pas shkëmbimeve të shumta të pengjeve izraelitë dhe të burgosurve palestinezë.
Marrëveshja përfshin tre faza dhe negociatat për fazën e dytë duhej të fillonin gjashtë javë më parë, por kjo nuk ndodhi.
Të martën në mbrëmje, Netanyahu tha se Izraeli do të vazhdojë të luftojë për të arritur të gjitha qëllimet e tij të luftës, “të kthejë pengjet, të heqë qafe Hamasin dhe të sigurohet që Hamasi të mos jetë një kërcënim për Izraelin”.
Izraeli u konsultua me administratën e presidentit amerikan Donald Trump përpara se të kryente sulmet, thanë zyrtarët.
