Presidenti i Rusisë, Vladimir Putin, deklaroi se lufta midis Shteteve të Bashkuara dhe Izraelit kundër Iranit ka shkaktuar një krizë globale energjetike, por ofroi ndihmën e Moskës për të lehtësuar situatën përmes furnizimeve me naftë dhe gaz, përfshirë edhe për vendet evropiane.
Në një fjalim të transmetuar drejtpërdrejt përpara zyrtarëve dhe drejtuesve të kompanive të naftës dhe gazit, ai paralajmëroi se prodhimi i naftës, i cili varet nga transporti përmes Ngushticës së Hormuzit, mund të ndalet së shpejti plotësisht.
“Prodhimi ka filluar të bjerë tashmë”, tha Putin.
Presidenti rus theksoi se vendi i tij është i gatshëm të ndihmojë çdo shtet me furnizimet e naftës dhe gazit, madje edhe vendet evropiane, për sa kohë që mund të nënshkruheshin kontrata afatgjata dhe politika mbahej jashtë kësaj marrëveshjeje. Ai përmendi eksportuesit rusë si “të dalluar për stabilitetin e tyre”.
Sipas Reuters, Rusia është eksportuesi i dytë më i madh i naftës në botë dhe ka rezervat më të mëdha të gazit natyror. Megjithatë, shumica e vendeve evropiane janë përpjekur të pakësojnë varësinë nga energjia ruse pas urdhrit të Putin për dërgimin e trupave në Ukrainë në shkurt të vitit 2022.
Putin shtoi gjithashtu se kompanitë ruse të naftës duhet të përfitojnë nga rritja “ndoshta e përkohshme” e çmimeve për të shlyer disa nga borxhet e tyre. Ai la të kuptohet se qeveria ruse mund të përdorë gjithashtu këtë rritje të çmimeve për të ulur deficitin në financat publike të vendit.