Pini ujë!”, është një nga frazat që dëgjojmë më së shumti nga mjekët, dermatologët dhe nutricionistët. Diskutime e studime të tëra mbështesin përfitimet e tij si ruajtja e temperaturës së trupit, mbrojtjes së organeve, nxjerrjen e lëndëve të panevojshme etj. Në varësi të dietës, këshillohet të paktën 2 litra ujë në ditë por ndodh që pavarësisht konsumimit të sasisë, sërish ndihemi të dehidratuar.
Për këtë ka shkaqe të ndryshme, por kryesorja ëshë çekuilibri i elektrolitëve. Uji nuk është i vetmi element që duhet për hidratim. Ne kemi nevojë për elektrolitë si kripa, magnezi dhe kaliumi dhe pirja e një sasie të madhe uji mund t’i tretë elektrolitet.
Trupi ynë përpiqet që të ruajë ekuilibrin e lëngjeve. Një prej formave që përdor janë elektrolitët që ndihmojnë qelizat. Sipas disa të dhënave të publikuara në Study Finds, pjesa më e madhe e amerikanëve marrin mjaftueshëm kripë çdo ditë, madje e tejkalojnë maksimumin e 2300 miligramëve por njëkohësisht nuk plotësojnë nevojat ditore për 4700 miligramë kalium dhe 400 magnez.
Bananet, uji i kokosit, patatet, fasulet dhe thjerrëzat janë burime kryesore të kaliumit. Burimet ushqimore të magnezit janë perimet e gjelbra, bishtajoret, arrat dhe farat. Konsumimi i sasisë së duhur të ujit dhe elektrolitëve jo vetëm do ndihmojë hidratimin, por do rregullojë edhe presionin e gjakut. Shumica e këtyre ushqimeve përmbajnë ujë ndaj mund të merrni më të mirën e të dyjave.
Marrja e sasisë së nevojshme të elektrolitëve është më e rëndësishme për njerëzit që djersijnë shumë sepse veç ujit, humbasin dhe këto elementë.
Konkluzioni i gjithë kësaj është se jo gjithmonë zgjidhja është konsumimi i sasive të mëdha të ujit. Provoni të konsumoni më shumë fruta dhe perime të pasura në elektrolitë si magnezi dhe kaliumi për të evituar ndjesinë e dehidratimit.
