Ditën e sotme “Aleanca për Teatrin” ka kërkuar që të zhvillojë një tubim para Bashkisë Tiranë që pritet të nisë në orën 10:00. Në kuadër të kësaj proteste, policia njofton se ka hartuar një plan masash për garantimin e sigurisë së qytetarëve.
Në zbatim të planit të masave, Policia e Shtetit njofton se sot prej orës 09:30 e në vijim, do të ketë bllokim të përkohshëm të qarkullimit të mjeteve, në bulevardin kryesor pranë Bashkisë së Tiranës. Për këtë arsye sugjerohet që të përdoren rrugë alternative, deri në përfundim të tubimit, si Unaza e Mesme dhe Unaza e Madhe.
Gjatë disa tubimeve të mëparshme, të zhvilluara nga “Aleanca për Mbrojtjen e Teatrit”, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë. Drejtoria Vendore e Policisë Tiranë u përsërit thirrjen organizatorëve, drejtuesve dhe pjesëmarrësve që të respektojnë ligjin dhe të distancohen nga çdo akt dhune.
Kjo është e disata herë që përfaqësuesit e “Aleancës për Teatrin” dhe ata të opozitës protestojnë para Bashkisë Tiranë duke kërkuar dorëheqjen e kryebashkiakut Erion Veliaj pasi disa nga ish-drejtorët e tij u vunë në pranga nën dyshimet për korrupsion dhe pastrim parash.
