Policia e Shtetit ka dalë me një sqarim lidhur me ngjarjen e rëndë të ndodhur në Tiranë, ku 28-vjeçarja Rezi u dhunua dhe u mbajt peng nga partneri i saj, Gleard Gusholli.
Përmes një deklarate zyrtare uniformat blu bëjnë me dije se kanë marrë të gjitha masat e nevojshme për sigurimin e jetës së 28 vjeçares dhe të familjes së saj.
Gjithashtu mësohet se përveç Gleard Gushollit janë vendosur para drejtësisë edhe personat të cilët kanë qenë në dijeni të kësaj ngjarje.
“Gjithashtu, në lidhje me këtë rast janë arrestuar për veprat penale “Moskallëzimi i krimit” dhe “Veprime që pengojnë zbulimin e së vërtetës”, shtetasit B. N., dhe A. Sh., si dhe për veprën penale “Përkrahja e autorit të krimit”, shtetasit B. K., dhe E. K.”, thuhet në njoftimin e Policisë.
28-vjeçarja u mor peng dhe u dhunua fizikisht nga partneri i saj, Gleard Gusholli. Ajo tregoi se me Gushollin është njohur rreth një vit e gjysëm më parë dhe ky gjest i tij sipas saj u bë për hakmarrje.
Siç tregoi Rezi për mediat, të dy ishin njohur në Gjermani dhe ajo e kishte ndihmuar 31 vjeçarin Gleard Gusholli të mjekohej, pasi dinte gjuhën shqipe. Aty ka nisur njohja e tyre dhe prindërit e 28 vjeçares, të cilët jetonin prej 30 vitesh në Gjermani, i kanë ndihmuar të jetonin bashkë.
Mirëpo, vajza thotë se që në ditët e para Gleardi kishte nisur ta dhunonte dhe prindërit e saj pasi e kishin marrë vesh këtë, e kishin përzënë 31 vjeçarin nga Gjermania. Pas një periudhe gati 3 mujore të ndarë, dy të rinjtë kanë rinisur të komunikojnë dhe vajza ka braktisur Gjermaninë për të bashkëjetuar me Gleardin.
Njoftimi i plotë i Policisë:
DVP Tiranë
Në lidhje me ngjarjen e dhënë për shtyp ditën e djeshme, mbi rastin e dhunimit të një shtetaseje, ju sqarojmë se:
28-vjeçarja është paraqitur për ndihmë në shërbimet e emergjencës mjekësore me datë 15.04.2023, ku është njoftuar dhe Policia, dhe me marrjen e këtij informacioni, Komisariati i Policisë Nr. 2 ka reaguar menjëherë me profesionalizëm për dokumentimin e plotë ligjor të ngjarjes dhe vënien e autorëve përpara përgjegjësisë penale, dhe ka shpallur në kërkim autorin e dyshuar të ngjarjes shtetasin G. G., 31 vjeç, i cili është arrestuar pak orë pas shpalljes në kërkim.
Gjithashtu, në lidhje me këtë rast janë arrestuar për veprat penale “Moskallëzimi i krimit” dhe “Veprime që pengojnë zbulimin e së vërtetës”, shtetasit B. N., dhe A. Sh., si dhe për veprën penale “Përkrahja e autorit të krimit”, shtetasit B. K., dhe E. K.
Policia e Shtetit ka marrë të gjitha masat e nevojshme për sigurimin e jetës së saj, gjatë qëndrimit në spital si dhe jashtë ambienteve të tij, si dhe gjithashtu të familjarëve të saj.