Fredi Kokoneshi, kryetar i Bashkisë së Divjakës dhe shoferi i tij Gazmend Bullari, janë plagosur me thikë në mes të qytetit këtë të premte. Autori është ndaluar nga Policia dhe mësohet se është shtetasi Orges Xhelili, ish-punonjës i IT në Bashkinë e Divjakës.
Ditën e sotme Kokoneshi është përballur me Xhelilin në qendër të qytetit, pranë Qendrës Shëndetësore të Divjakës, dhe kanë pasur një debat me tone të ashpra. Shkaqet nuk dihen ende, pasi ngjarja ka ndodhur vetëm pak minuta më parë.
Orges Xhelili gjatë debatit ka nxjerr thikën që mbante me vete dhe ka qëlluar kryebashkiakun socialist Fredi Kokoneshi. Menjëherë ka ndërhyrë shoferi i këtij të fundit, shtetasi Gazmend Bullari, i cili po ashtu ka marrë plagë të shumta.
Ish-punonjësi i IT në Bashkinë e Divjakës është larguar nga vendngjarja por Policia ka mundur ta arrestojë atë.
Divjakë / Informacion paraprak
Rreth orës 09:30, në afërsi të bashkisë Divjakë, shtetasi O. Xh., 46 vjeç, dyshohet ka goditur me mjet prerës, shtetasin F. K., me detyrë Kryetar i bashkisë Divjakë dhe shoferin e tij, shtetasin G. B., 45 vjeç. Të dëmtuarit janë transportuar menjëherë dhe po marrin ndihmë mjekësore, në Spitalin Rajonal Lushnjë.
Falë veprimeve të shpejta operacionale të shërbimeve të Policisë, është kapur dhe shoqëruar në Komisariat, për veprime të mëtejshme procedurale, shtetasi O. Xh., si autor i dyshuar i plagosjes. Në vendngjarje ndodhen drejtuesit më të lartë të DVP Fier.
Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes.
