Rreth 20 482 kg mandarina janë asgjësuar sot në një pikë grumbullimi për eksport në Divjakë nga Autoriteti Kombëtar i Ushqimit. Ky vendim u mor pas Bashkimi Evropian i ktheu mbrapsht këto prodhime shqiptare, pasi përmbajnë substanca të ndaluara të përdorura nga kultivuesit.
Sipas drejtorit të AKU, Arnold Pashollari, kjo sasi do të asgjësohet në bashkëpunim edhe me Inspektoratin e Mjedisit. Madje do të nisin kontrollet edhe në farmacitë bujqësore për të parë nëse tregtohen pesticide të ndaluara.
Gjatë periudhës 29 Nëntor-11 Dhjetor 2024, Sistemi Europian i Sigurisë Ushqimore RASFF ka raportuar tre raste të ndotjes me mbetje të pesticideve Chlorpyrifos dhe Phosmet në ngarkesa mandarinash me origjinë nga Shqipëria. Këto substanca janë të rrezikshme për shëndetin e njeriut dhe të ndaluara në Bashkimin Europian për shkak të dëmeve të tyre afatgjata.
