Izraeli ka nisur një sulm masiv në Rripin e Gazës, pasi u bëri thirrje civilëve që të largohehsin.
100 avionë u angazhuan njëkohësisht për të bombarduar në veriun e Gazës, ndërsa Hamasi thotë se tanket izraelite po futen në Gaza, teksa në kufi ka përleshje me forcat e Hamasit. Njësia e parë e tankeve që hyri në Gaza ishte Hativa 7, Brigada e 7-të e Tankeve, ajo që ndaloi sirianët në vitin 1973 në Golan.
Mbrojtja izraelite në një reagim tha se “Aktiviteti që po zhvillohet në Gaza nuk është një pushtim zyrtar tokësor”, pa shtuar më shumë informacione.
Zëdhënësi i ushtrisë izraelite, Daniel Hagari i bën thirrje banorëve të qytetit të Gazës që të largohen në drejtim të jugut, pasi tashmë kanë nisur zgjerimin e operacionit ushtarak.
“Forcat tokësore të Izraelit po i zgjerojnë operacionet e tyre sonte. Ne jemi të përgatitur në të gjitha frontet për të ruajtur sigurinë e Izraelit. Gjatë orëve të fundit kemi shtuar sulmet në Gaza. Forcat Ajrore sulmojnë gjerësisht objektivat nëntokësore dhe infrastrukturën terroriste. IDF po punon fuqishëm në të gjitha dimensionet për të arritur objektivat e luftës”– ka thënë zëdhënësi i ushtrisë izraelite, sipas BBC.
Civilët kanë qenë shënjstra e sulmeve nga të dyja forcat ushtarake, teksa deri më tani raportohet për mbi 7 mijë viktima.
Mbi 1.4 milion njerëz në Gazë kanë ikur prej shtëpive të tyre, dhe gjysma besohet se janë nëpër strehat e Kombeve të Bashkuara. Qindra mijëra njerëz vazhdojnë të qëndrojnë në veri të Gaza, pavarësisht thirrjeve të Izraelit për t’u evakuuar.
Izraeli e ka bombarduar Rripin e Gazës prej 7 tetorit, ditën kur Hamasi ka kryer sulme në tokën izraelite, duke i lënë të vdekur 1.400 persona. Grupi militant ka marrë edhe 200 pengje, disa prej tyre foshnje.
