Shqipëria mban vendin e parë në Europë si shteti që ka pasur rritjen më të madhe të turistëve për 2023 me mbi 53% më shumë se në vitin 2019 dhe vendin e katërt në botë, për rritjen më të madhe që pas pandemisë.
Kjo sipas raportit të fundit të Organizatës Botërore të Turizmit, që raporton shifra dhe rendit përformancën turistike të të gjitha vendeve të botës për vitin që lamë pas.
Të dhënat tregojnë se në kontinetin e vjetër, vendet që kanë performuar më mirë për 2023 janë ato të vogla, ndërsa ato me traditë në turizëm e kanë pasur të vështirë të tejkalojnë vetveten.
Me mbi 10 milionë turistët e saj në një vit, Shqipëria kryeson listën e ndjekur nga Andorra, Lihtenshtejni, Islanda, Serbia etj. Me rritje më të ulët vijnë emra tradicionalë të turizmit si Portugalia, Mali i zi, Malta e Turqia.
Këto shifra të larta, padyshim që kanë dhënë efektet pozitive për Europën, e cila ka pritur 700 milion turistë ose 54% të totalit botëror.
Ndërsa listën në botë e kryesojnë ishujt e vegjël “Turks dhe Kaikos” pranë Bahamas ndjekur nga Katari, Arabia Saudite dhe Shqipëria që është ngjitur në vend të katërt.
Këto shifra që kanë rikuperuar ndjeshëm humbjet në vitet e pandemisë, janë përkthyer edhe në para. Të ardhurat totale nga viti turistik botëror përllogariten në 1.6 trilionë Dollarë, shumë pranë 2019-tës, e cila xhiroi 1.7 trilionë.
Por raporti i Organizatës Botërore të Turizmit, parashikon se si do të jetë 2024-a. Sipas indeksit të besimit në turizëm, perspektiva e 2024 është më pozitive se ajo e 2023.
Edhe për Shqipërinë, sinjalet janë që 2024 do të jetë viti më i mirë turistik pasi muaji Janar u mbyll me 490 mijë të huaj, 30% më shumë sesa në Janarin e vitit të shkuar, ndërsa shifra prej 10 milionë turistë të regjistruar në 2023 pritet të tejkalohet.
