Nëna e Ajola Xoxës, Valbona Xoxa është paraqitur në SPAK paraditen e sotme.
Sipas burimeve të afërta, Valbona Xoxa, vjehrra e kryebashkiakut Erion Veliajt, do të merret në pyetje nga organet e hetimit për disa çështje. Ajo do të pyetet lidhur me vilën e saj në Qerret, si dhe për transaksionet e kryera me kompaninë e së bijës, “Ava Studio”. Po ashtu, hetuesit do të fokusohen edhe në blerjet online të kryera me kartën e saj bankare, për të verifikuar origjinën dhe qëllimin e këtyre transaksioneve.
Prokuroria e Posaçme Antikorrupsion (SPAK) ka bërë të ditur arrestimin e Erion Veliajt dhe masën e sigurisë “arrest në shtëpi” ndaj bashkëshortes së tij, Ajola Xoxa, si dhe masat e sigurisë “detyrim paraqitje” për 5 biznesmenë të tjerë.
Sipas SPAK, Erion Veliaj akuzohet për “Korrupsion pasiv të funksionarëve të lartë shtetërorë ose të të zgjedhurve vendorë”, kryer në bashkëpunim (9 herë), si dhe për “Pastrimi i produkteve të veprës penale ose veprimtarisë kriminale”.
Ajola Xoxa akuzohet për veprën penale të “Korrupsionit pasiv të funksionarëve të lartë shtetërorë ose të të zgjedhurve vendorë”, kryer në bashkëpunim (9 herë), për “Pastrimin e produkteve të veprës penale ose veprimtarisë kriminale”, si dhe për “Refuzimin për deklarimin, mosdeklarimin, fshehjen ose deklarimin e rremë të pasurive, interesave private të personave të zgjedhur dhe nëpunësve publikë, ose të çdo personi tjetër që ka detyrimin ligjor për deklarim”.
