33 persona kontribuan financiarisht që një vajzë të gëzonte ditën më të bukur të dasmës me partnerin e saj. BBC shkruan se 23 vjeçarja Katelen Cheshire u martua me 29 vjeçarin Billy Green javën e shkuar. Ceremonia e tyre ishte mahnitëse dhe u zhvillua në Shrewsbury të Britanisë së Madhe.
Ajo që bie në sy është se çdo detaj në dasmë kishte të bënte me Krishtlindjet.
Por pse kjo dasmë u financua? Katelen është diagnostikuar me kancer dhe pas një beteje të gjatë, ajo zbuloi se sëmundja iu rikthye sërish këtë vit.
“Ishte e pabesueshme mënyra si e organizuan dasmën”, tha ajo. “Kanë bërë një punë të mrekullueshme për mua dhe Bill, s’kemi fjalë për t’i falënderuar”, shtoi Katelen.
Ndërkohë një nga organizatoret e kësaj dasme, Cindy Edwards që drejton “Stanford Farm” tha se qau nga gëzimi kur çifti pa gjithë arredimin. Ajo thotë se dekorimi e bëri ambientin të dukej si një dimër përrallor, me muzikë live, qirinj, trëndafila të bardhë, të kuq e shumë elementë Krishtlindjesh. Ajo shton se të gjithë personat e tjerë bashkëpunëtorë në këtë organizim, fillimisht u fshehën derisa çifti mbërriti te restoranti.
Ata u kujdesën që asgjë të mos mungonte. Cindy thekson se kur Katelen është pyetur se çfarë do e bënte të lumtur në këtë periudhë, përgjigjia e saj e shpejtë ishte: Të martohem me Bill!
“Është shumë e bukur t’i shohësh bashkë, të dy e donin këtë dasmë”, thotë ajo.
“Stanford Farm” është një kompani që gjatë verës organizon shumë dasma, por drejtuesja tha në fund se pas realizimit me sukses të kësaj dasme surprizë, as dimri nuk është një ide e keqe për evente kaq të rëndësishme.
