Koreja e Veriut ka lëshuar një raketë balistike ndërkontinentale me rreze të mjaftueshme për të goditur territorin e SHBA-së, tha ministri japone i mbrojtjes.
Raketa ra në det afërsisht 210 km (130 milje) në perëndim të Hokkaido.
SHBA e ka dënuar lëshimin e raketës, ndërsa Koreja e Jugut ka urdhëruar masa më të forta parandaluese kundër Veriut.
Të enjten, Ministri i Jashtëm i Koresë së Veriut, Choe Son Hui, paralajmëroi për një përgjigje “më të ashpër” ndaj çdo pranie të shtuar ushtarake amerikane në rajon.
Koreja e Veriut lëshoi gjithashtu një raketë balistike me rreze të shkurtër veprimi në të njëjtën ditë.
Këto veprime erdhën pas takimit të së dielës midis presidentit të Koresë së Jugut Yoon Suk-yeol, Presidentit të SHBA Joe Biden dhe kryeministrit të Japonisë Fumio Kishida në Kamboxhia, në të cilin të tre vendet ranë dakord të rrisin bashkëpunimin e tyre ushtarak.
Të premten, zëdhënësja e Këshillit të Sigurisë Kombëtare të SHBA-së, Adrienne Ëatson tha se zoti Biden ishte informuar dhe SHBA do të konsultohej me partnerët.
Koreja e Veriut ka lëshuar më shumë se 50 raketa gjatë dy muajve të fundit, shumica e tyre me rreze të shkurtër. Këto lëshime me rreze të gjatë janë më të rralla dhe përbëjnë një kërcënim të drejtpërdrejtë për SHBA-në, pasi raketat janë projektuar për të transportuar koka bërthamore kudo në SHBA.
