Një i ri është gjetur i plagopsur pranë rreth-rrotullimit të Shëngjinit në Lezhë.
22-vjeçari me fraktura në kokë është dërguar drejt Spitalit të Traumës në Tiranë, pasi mori ndihmën e parë në spitalin e Lezhës.
Nuk dihen ende rrethanat e ngjarjes, teksa policia ka nisur verifikimet për rastin.
“Rreth orës 06:05, salla operative e Policisë së Lezhës është njoftuar nga spitali rajonal i Lezhës, se në afërsi të rrethrrotullimit të Shëngjinit, është marrë me autoambulancë, i dëmtuar në kokë, shtetasi G. B., 22 vjeç. Nga hetimet e deritanishme dyshohet se 22-vjeçari ka rënë aksidentalisht nga lartësia e një lokali në vendin ku është gjetur i dëmtuar.
Ky shtetas është transportuar në Spitalin e Traumës dhe është në gjëndje të rëndë shëndetësore”, njofton policia.
Dyshimet e para janë se i riu nga Shkodra mund të jetë dhunuar nga persona ende të paidentifikuar dhe është lënë pa ndjenja pranë rreth-rrotullimit.
