Një sasi eksplozivi e pa shpërthyer ka vënë në alarm mëngjesin e kësaj të mërkure policinë në Sarandë. Lënda shpërthyese u gjet jashtë një dyqani, në lagjen numër 2 të këtij qyteti. Menjëherë autoritetet policore bënë rrethimin e zonës dhe pritet ndëhyrja e forcave xheniere.
“Sot rreth orës 08:20, në lagjen nr. 2, Sarandë, në derën e jashtme të një dyqani në pronësi të shtetasit I. Th., është konstatuar një kallëp me lëndë të dyshuar plasëse. Grupi hetimor vijon veprimet për sqarimin e rrethanave të ngjarjes, identifikimin dhe kapjen e autorit/ëve”, tha policia e Vlorës në një informacion paraprak për ngjarjen.
Klan News raporton se pranë vendit të ngjarjes ndodhen zyrat e OSHEE, një shkolle publike dhe një private. Dyqani ku është vendosur lënda eksplozive shërben për shitjen e luleve dhe zbukurimeve për festa dhe është në pronësi të familjarit të një avokati në Sarandë.
