Një fenomen optik i rrallë dhe mbresëlënës atmosferik, i njohur si “paraselene”, është vërejtur gjatë natës mbi Moskë dhe zonat përreth. Pamja e pazakontë ka tërhequr vëmendje të madhe dhe është shpërndarë gjerësisht në rrjetet sociale, ku shumë qytetarë kanë publikuar fotografi të momentit.
Paraselena është një dukuri e veçantë atmosferike, gjatë së cilës në qiell shfaqen disa imazhe të ndritshme të Hënës. Ky fenomen nuk përfaqëson një shumëzim real të satelitit natyror të Tokës, por është rezultat i një iluzioni optik të krijuar nga përthyerja dhe reflektimi i dritës së hënës në atmosferë.
Sipas shpjegimeve shkencore, paraselema formohet kur drita e Hënës kalon përmes kristaleve gjashtëkëndore të akullit, të cilat ndodhen të pezulluara në shtresat e larta të atmosferës. Këto kristale funksionojnë si prizma natyrore, duke shpërndarë dritën dhe duke krijuar pika të ndritshme shtesë, të njohura si “pseudohëna”, në të dyja anët e imazhit kryesor të Hënës.
