Detaje të reja nga ngjarja në Tiranë, ku u tentua të grabitej një banesë në zonëne Prushit.
Sipas policisë, dyshohet se kanë qenë 3 persona që do kryenin grabitjen, të cilët teksa kanë pikasur praninë e uniformave blu kanë qëlluar me armë. Më pas edhe policia u është kundërpërgjigjur
Më pas, autorët u larguan nga vendngjarja me një makinë Audi me targa të vjedhura në drejtim të Liqenit të Thatë.
Në tentativë për tu larguar me shpejtësi, njëri nga autorët ka përplasur me makinë një efektiv policie. Fatmirësisht nuk ka dëme serioze.
“Tiranë/Informacion paraprak
Më datë 09.12.2023, rreth orës 19:13, në fshatin Prush, përballë ambulancës, në banesën e shtetasit G. H., janë futur disa persona, të armatosur.
Me marrjen e njoftimit shërbimet e Policisë kanë shkuar menjëherë në vendngjarje, dhe në momentin që janë afruar afër banesës, tre personat e armatosur, kanë qëlluar me armë ndaj tyre. Policia është përgjigjur me armë ndaj tyre.
Shërbimet e DVP Tiranë, RENEA, Forcat Kombëtare të Sigurisë, po vijojnë krehjen e zonës dhe kanë ngritur pika kontrolli në të gjitha akset kryesore dhe hyrje-daljet e Tiranës, për identifikimin dhe kapjen e autorëve të dyshuar”, njofton policia.