“Shpirti i Amerikës është në rrezik”, thotë Joe Biden në një mesazh drejtuar amerikanëve. Ditën e sotme, 15 janar, do të mbajë fjalimin e lamtumirës.
Në një letër drejtuar amerikanëve, të publikuar nga Shtëpia e Bardhë, Joe Biden flet me krenari për përmbushjen e detyrës së tij dhe bën thirrje për vigjilencë: “Kandidova për president sepse besoja se shpirti i Amerikës ishte në rrezik. Se vetë identiteti ynë ishte në rrezik. Kjo është ende e vërtetë”.
“Idealet e Amerikës janë në duart tona”, paralajmëron Joe Biden.
Presidenti në largim i referohet indirekt presidentit të sapozgjedhur Donald Trump, duke kujtuar se kur ai erdhi në pushtet në janar 2020, Shtetet e Bashkuara nuk po përballeshin vetëm me pandeminë dhe një krizë të rëndë ekonomike, por edhe me “sulmin më të keq ndaj demokracisë që nga Lufta e Pavarësisë”.
Joe Biden u betua disa ditë pasi Kapitol u sulmua nga mbështetësit e Trump, të cilët refuzuan të pranonin humbjen e tij në zgjedhjet presidenciale.
“Sot ekonomia jonë është më e forta në botë,” shkruan Joe Biden në letër, duke e lënë pasardhësin e tij me rritje të fuqishme ekonomike dhe papunësi të ulët.
“Inflacioni vazhdon të ulet”, shton ai.
Joe Biden thekson se krimi është në nivelet më të ulëta.
“T’i shërbeja vendit ka qenë privilegji më i madh i jetës sime. Unë i dhashë jetën dhe shpirtin tim vendit tonë”, shkruan Joe Biden pak ditë para se t’i dorëzojë presidencën Donald Trump.
