Media britanike “The Telegraph” në një artikull kushtuar shpalljes “non grata” të Sali Berishës nga Britania e Madhe, thotë se ish-kryeministri ka harxhuar 400 mijë paund për të hyrë sërish në Angli.
Ish-kryeministri i Shqipërisë, Sali Berisha, i dyshuar për korrupsion, ka shpenzuar më shumë se 400 mijë paund për të luftuar ndalimin që i është bërë nga qeveria britanike për të hyrë në Angli.
Sali Berisha, 79 vjeç, i cili është paditur për korrupsion në Shqipëri, u përjashtua nga Britania e Madhe nga Priti Patel, sekretarja e atëhershme e Brendshme, pas akuzave për korrupsion.
Ai shërbeu si president i Shqipërisë midis 1992 dhe 1997 dhe si kryeministër nga 2005 deri në 2013. Ai është kreu i Partisë Demokratike të opozitës.
Dhjetorin e kaluar, Sali Berisha u la në arrest shtëpie, ndërsa hetohet për dyshimin se ka shpërdoruar detyrën për të përfituar dhëndri i tij, Jamarbër Malltezi.
Berisha i ka mohuar akuzat dhe ka thënë se ato janë orkestruar nga Edi Rama, kryeministri aktual.
Ai apeloi kundër urdhrit të përjashtimit në një gjykatë të posaçme imigracioni, por ai u refuzua me bazën se ishte e drejta sovrane e Mbretërisë së Bashkuar të kontrollonte hyrjen përmes kufijve të saj.
Akuza “Korrupsion pasiv”
Tashmë përmes dokumenteve në Shqipëri ka dalë se zoti Berisha ka shpenzuar më shumë se 500,000 € (417,500 £) duke punësuar avokatë në Mbretërinë e Bashkuar për të luftuar shpalljen e tij “non grata”.
Një burim në Shqipëri që ka parë dosjen tha: “Për qëllimin e këtij apelimi në SIAC [Komisioni Special i Apelimit të Emigracionit] vajza e tij nga llogaria e saj bankare në vitin 2022 ka bërë një pagesë prej 72,000 €. Më pas në vitin 2023 një pagesë prej 250,000 € dhe pagesa e fundit prej 200,000 €.
Berisha është akuzuar nga prokurorët e SPAK-ut për korrupsion pasiv, vepër penale që dënohet maksimalisht deri në 12 vjet burg në rastet kur vërtetohet se personi ka përfituar direkt ose indirekt nga veprimet e tyre të paligjshme.
