Një aksident me një të plagosur është regjistruar këtë të shtunë në aksin rrugor Korçë – Ersekë.
Ngjarja ka ndodhur në afërsi të kryqëzimit të fshatit Kamenicë, ku një mjet tip “Mercedes-Benz” është përplasur me një mjet të tonazhit të rëndë, ndërkohë që në këtë aksident është përfshirë edhe një tjetër mjet.
Sipas policisë, mjeti i tonazhit të rëndë ka qenë duke ardhur nga Erseka në drejtim të Korçës, ndërsa mjeti tip “Benz” ka qenë duke lëvizur në sensin e kundërt.
Ka qenë drejtuesi i mjetit “Benz” ai që ka devijuar në krahun tjetër, duke shkaktuar përplasjen në njërën nga gomat e mjetit të tonazhit të rëndë. Si pasojë, është plagosur drejtuesi i mjetit, i cili ndodhet në spitalin e Korçës nën kujdesin e mjekëve.
Burime pranë këtij spitali thanë se i plagosuri është jashtë rrezikut për jetën. Policia në vendngjarje po heton për shkaqet e këtij aksidenti.
