Gjumi është thelbësor për shëndetin fizik dhe mendor, por stresi, ritmi i shpejtë i jetesës dhe përdorimi i pajisjeve elektronike po ndikojnë gjithnjë e më shumë në cilësinë e tij.
Pagjumësia kronike dhe apnea obstruktive e gjumit janë ndër çrregullimet më të zakonshme. Psikiatrja dhe specialistja e gjumit, Persa Papatheodosiou, në një intervistë për mediat greke, shpjegon faktorët që ndikojnë në pushimin e natës dhe shenjat që nuk duhet të neglizhojmë.
Sipas ekspertes, shumica e të rriturve kanë nevojë për 7-9 orë gjumë në natë, megjithëse nevojat ndryshojnë nga personi në person. Përtej numrit të orëve, rëndësi ka edhe mënyra se si ndihemi gjatë ditës.
Përgjumja e fortë gjatë aktiviteteve të zakonshme ose nevoja për shumë më tepër gjumë se më parë mund të jenë shenja të një problemi shëndetësor që kërkon vlerësim specialistik.
Pse po shtohen çrregullimet e gjumit?
Papatheodosiou thekson se rritja e diagnozave nuk nënkupton domosdoshmërisht shtim të rasteve, por lidhet edhe me metodat më të avancuara të diagnostikimit dhe ndërgjegjësimin më të madh.
Megjithatë, mungesa kronike e gjumit dhe rritja e peshës trupore janë faktorë që ndikojnë realisht në shëndetin e gjumit, veçanërisht në rrezikun për apnenë obstruktive.
Edhe përdorimi i telefonave para gjumit mund të ndikojë negativisht. Përveç dritës blu të ekraneve, lajmet shqetësuese, rrjetet sociale dhe përmbajtjet stresuese rrisin aktivitetin mendor dhe e vështirësojnë relaksimin.
Pagjumësia dhe apnea, shenjat që duhen njohur
Pagjumësia shfaqet përmes vështirësisë për të fjetur, zgjimeve të shpeshta gjatë natës ose zgjimit të parakohshëm.
Ndërsa apnea obstruktive karakterizohet nga ndërprerje të përsëritura të frymëmarrjes gjatë gjumit dhe shoqërohet shpesh me gërhitje, gjumë jo të qetë dhe përgjumje gjatë ditës.
Si mund të përmirësohet gjumi pa ilaçe?
Ekspertja nënvizon se jo çdo problem me gjumin kërkon trajtim medikamentoz. Fillimisht duhet të identifikohet shkaku dhe të vlerësohet gjendja e individit.
Një nga metodat më efektive për pagjumësinë kronike është Terapia Konjitive e Sjelljes për Pagjumësinë (CBT-I), e konsideruar trajtimi i linjës së parë për këtë çrregullim.
Sipas Papatheodosiou, cilësia e gjumit nuk varet vetëm nga numri i orëve të pushimit, por edhe nga zakonet e përditshme dhe shëndeti i përgjithshëm. Prandaj, çdo problem kërkon vlerësim dhe trajtim të personalizuar.