Kanceri vazhdon të jetë një nga sfidat më të mëdha për shëndetin publik në mbarë botën. Sipas raportit më të fundit të Organizatës Botërore të Shëndetësisë (OBSH), sëmundja shkakton mbi 26 mijë vdekje çdo ditë, ose rreth 10 milionë humbje jete në vit.
Çdo vit diagnostikohen afërsisht 20.6 milionë raste të reja me kancer, ndërsa parashikimet tregojnë se, nëse nuk forcohen masat parandaluese, ky numër mund të arrijë në rreth 35 milionë raste deri në vitin 2050.
Raporti i përgatitur nga OBSH dhe Agjencia Ndërkombëtare për Kërkime mbi Kancerin (IARC) nxjerr në pah pabarazitë e mëdha në aksesin ndaj diagnostikimit, trajtimit dhe kujdesit shëndetësor. Në vendet me të ardhura të larta, 87% e grave të diagnostikuara me kancer gjiri mbijetojnë të paktën pesë vjet pas diagnozës, ndërsa në vendet me të ardhura të ulëta kjo përqindje zbret në vetëm 42%.
Sipas të dhënave, gati katër në dhjetë raste të kancerit lidhen me faktorë që mund të parandalohen, si përdorimi i duhanit, konsumimi i alkoolit, obeziteti, mungesa e aktivitetit fizik, ndotja e ajrit dhe disa infeksione.
OBSH paralajmëron se shumica e njerëzve do të përballen me kancerin gjatë jetës, qoftë personalisht apo përmes një anëtari të familjes. Për këtë arsye, organizata u bën thirrje qeverive të rrisin investimet në parandalim, zbulim të hershëm dhe trajtim cilësor e të barabartë për të gjithë.
