Tensionet mes SHBA-së dhe Iranit janë rritur ndjeshëm pasi Teherani iu përgjigj sulmeve amerikane ndaj një objekti ushtarak pranë aeroportit Bandar Abbas me një sulm ndaj një baze ajrore amerikane në zonë.
SHBA-të kishin thënë më parë se kishin kryer “sulme mbrojtëse”, duke thënë se objektivi përbënte një kërcënim për trupat amerikane dhe anijet tregtare në Ngushticën e Hormuzit , një nga korridoret më kritike të transportit të naftës në botë.
Nga ana tjetër, Teherani e cilësoi operacionin amerikan si “agresion të paprovokuar”, ndërsa forcat iraniane njoftuan se ishin hakmarrë duke goditur një bazë amerikane. Sipas mediave iraniane, Garda Revolucionare paralajmëroi se çdo sulm i ri do të përballet me një përgjigje edhe më të ashpër.
“Armiku e di se agresioni nuk do të mbetet pa përgjigje”, thuhet në deklaratën e autoriteteve iraniane, të cilat ia atribuojnë përgjegjësinë për pasojat palës amerikane.
Përplasjet e fundit kanë shtuar pasigurinë mbi fatin e armëpushimit të brishtë mes dy vendeve. Më herët gjatë javës, Uashingtoni kishte njoftuar se kishte goditur mjete detare iraniane që, sipas SHBA-së, po vendosnin mina në zonën e Hormuzit. Irani i konsideroi këto veprime si shkelje të marrëveshjes së armëpushimit.
Irani: Nuk tërhiqemi nga “vijat e kuqe”
Kreu i komisionit parlamentar për sigurinë kombëtare në Iran, Ebrahim Azizi, deklaroi se Teherani nuk do të heqë dorë nga kërkesat kryesore në negociatat me SHBA-në. Ai theksoi se Irani nuk do të negociojë mbi të drejtën për pasurimin e uraniumit, kontrollin e Ngushticës së Hormuzit dhe heqjen e sanksioneve ekonomike.
Azizi akuzoi presidentin amerikan Donald Trump se po lëviz “nga kërcënimet te thirrjet për marrëveshje”, në përpjekje për të dalë nga ajo që e quajti “ngërç strategjik”.
Trump: Ende nuk jemi të kënaqur
Presidenti Trump deklaroi gjatë mbledhjes së kabinetit se udhëheqja iraniane “dëshiron shumë një marrëveshje”, por shtoi se propozimet e deritanishme nuk janë të pranueshme për SHBA-në.
“Do të arrijmë një marrëveshje, ose do ta përfundojmë punën”, paralajmëroi ai.
Një nga pikat më të debatueshme mbetet fati i rezervës iraniane prej rreth 400 kilogramësh uranium të pasuruar në nivel të lartë.
Sulme dhe sanksione të reja
Një zyrtar amerikan konfirmoi se forcat amerikane kanë shkatërruar katër dronë iranianë dhe kanë bombarduar një qendër kontrolli në Bandar Abbas për të parandaluar ngritjen e një droni tjetër.
Sipas burimeve iraniane, gjatë natës u dëgjuan disa shpërthime në lindje të qytetit Bandar Abbas.
Ndërkohë, Departamenti Amerikan i Thesarit vendosi sanksione të reja ndaj Autoritetit Iranian të Ngushticës së Gjirit Persik, institucioni i krijuar nga Teherani për mbledhjen e tarifave të kalimit në Ngushticën e Hormuzit.
Sekretari amerikan i Thesarit, Scott Bessent, deklaroi se Irani po përpiqet të përdorë kontrollin e Hormuzit për të ushtruar presion ekonomik mbi tregtinë globale dhe paralajmëroi se çdo kompani apo shtet që paguan tarifa tranziti mund të përballet me sanksione amerikane.