Pas një muaji agjërimi e sakrificash, besimtarët myslimanë festojnë sot Fitër Bajramin. Komuniteti Mysliman i Shqipërisë dhe besimtarët të shumtë u mblodhën në Sheshin “Skënderbej” për faljen e Namazit
Ceremonia nisi në orën 06:45 me leximin e Kuranit dhe ligjëratën, e më pas vijoi me faljen e madhe në shesh. Kreu i Komunitetit Mysliman, në fjalën e tij uroi të gjithë besimtarët anembanë dhe gjithashtu që “Zoti t’u ketë pranuar agjërimin dhe t’i ndihmojë në përballimin e sfidave të jetës”.
“Të dashur besimtarë vëllezër dhe motra, sot agimi i Fitër Bajramit na gjen me zemrat e mbushura me dritën e besimit dhe me shpresën se sakrifica është pranuar nga krijuesi ynë. Ramazani nuk ishte vetëm një muaj i adhurimit, por një shkollë e përkushtimit, e durimit dhe e reflektimit mbi qenien tonë”, tha Spahiu.