Ditën e djeshme, fshati Gruemirë në Malësinë e Madhe u trondit nga dy ngjarje të njëpasnjëshme, të kryera nga të njëjtët autorë.
Mëngjesin e së shtunës, dy persona të maskuar, duke lëvizur me motor, iu afruan banesës së familjes Kurtaj dhe qëlluan me shotgun drejt kamerave të sigurisë, përpara se të largoheshin drejt një zone malore.
Mbrëmjen e po asaj dite, të njëjtët persona u rikthyen nga zona malore, por këtë herë u përballën me tre djemtë e familjes, Mirsad, Besim dhe Edison Kurtaj, të cilët i pritën në rrugë me automjetin e tyre.
Kur autorët kuptuan se po ndiqeshin, qëlluan me breshëri në ajër dhe në tokë, ndërsa ndjekja mes tyre zgjati rreth 10 minuta e shoqëruar me të shtëna dhe afro 100 plumba. Në një moment, njëri prej agresorëve humbi kontrollin dhe u rrëzua nga motori, por arriti të largohej përmes fushave të mbjella të fshatit.
Policia e Malësisë së Madhe ka nisur hetimet dhe është vënë në ndjekje të autorëve, ndërkohë që tre vëllezërit Kurtaj, në deklaratën e tyre, thanë se nuk e dinë identitetin e sulmuesve.
Në vendngjarje si provë materiale policia gjeti disa gëzhoja, ndërsa pritet që në ndihmë për identifikimin e autorëve ti vijnë kamerat e sigurisë të familjes Kurtaj. Megjithatë mbetet e vështirë për grupin hetimor, pasi zona në tërësi është e pambuluar me kamera sigurie.
