Katër persona vdiqën dhe 26 u plagosën pasi një tren pasagjerësh u përplas me një tren mallrash në Çeki. Aksidenti ndodhi rreth orës 23:00 të së mërkurës në lindje të Pragës, pjesë e korridorit kryesor hekurudhor të vendit.
“Përplasja e trenit është një fatkeqësi e madhe. Të gjithë po mendojmë për viktimat dhe të lënduarit.”, tha kryeministri Peter Fiala në rrjetin X.
Sipas zjarrfikësve, në trenin e pasagjerëve udhëtonin rreth 300 persona. Vagoni i parë është shkatërruar plotësisht. Ndërsa treni i mallrave kishte 21 vagona dhe ishte mbi gjysmë kilometri i gjatë.
Sipas raportimeve paraprake shumë prej të plagosurve ndodhen në gjendje të rëndë ndërsa një hetim ka nisur për të zbuluar shkaqet që çuan në këtë aksident të rëndë.
