Një automjet ka shpërthyer në një urë që lidh SHBA-në dhe Kanadanë pranë Ujëvarës së Niagarës, sipas FBI-së.
Sipas asaj që raporton BBC, ngjarja ka ndodhur në Urën Rainbow një ditë para festës së Falenderimeve në SHBA, një nga ditët më të ngarkuara të udhëtimit të vitit.
Autoritetet thonë se shpërthimi erdhi nga një makinë, e cila po përpiqej të hynte në SHBA nga Kanadaja.
“Meqenëse kjo situatë është në zhvillim, kjo është gjithçka që mund të themi në këtë moment,” tha FBI në një deklaratë.
Të gjithë kalimet aktualisht janë të mbyllura deri në një njoftim të dytë, thonë zyrtarët.
Guvernatorja e Nju Jorkut Kathy Hochul gjithashtu konfirmoi se kishte pasur një incident teksa tha se ajo ishte informuar nga forcat e zbatimit të ligjit. “Agjencitë shtetërore janë në vend dhe të gatshme për të ndihmuar,” postoi ajo në “X”.
Ajo gjithashtu tha se po udhëton për në Buffalo për t’u takuar me organet e zbatimit të ligjit atje dhe do të përditësojë banorët e Nju Jorkut kur të ketë më shumë informacione.
Përveç Urës Rainbow, incidenti ka çuar në mbylljen e tre pikave të tjera kufitare ndërkombëtare në rajon. Ura e Paqes, Ura Lewiston-Queenston, Ura Whirlpool dhe Ura Rainbow janë të mbyllura në të dy drejtimet, thonë zyrtarët.
