Kryetari i Partisë Demokratike, Sali Berisha ditën e sotme ka marrë pjesë në një takim të organizuar nga dega 7 në Tiranë. Berisha tha se Partia Demokratike përgjtë këtij viti ka kaluar situata të vështira, por shton se tani po ecin të sigurt drejt fitores së zgjedhjeve më 11 maj.
Berisha: Ne, gjatë këtij viti u përballëm me format më të egra të represionit, format më të egra të censurës. U përballëm me shfaqjet më të shëmtuara të narkoshtetit dhe narkodiktaturës, por ja ku jemi sot më të vendosur se kurrë në fitoren e 11 majit. Ne, jemi sot më të sigurtë se kurrë në fitoren e 11 majit, sepse sot, para çdo shqiptari ne paraqitemi avoketër të ndershëm, të guximshëm të interesave të tij.
Ai thekson se ka mbrojtur interesin kombëtar dhe fondet publike të qytetarëve shqiptarë. Më tej, Berisha tha se kanë një program i cili do t’i japë përgjigje situatës së vendit, të cilën ai e cilëson emergjente.
Berisha: Ne, kemi mbrojtur palëkundur, së pari, interesin kombëtar që është interesi i parë i çdo njeriu të qytetëruar. Ne, kemi bërë gjithçka për të mbrojtur pasuritë dhe fondet publike të qyetarëve shqiptarë nga një lukuni e pangopur që nuk e ka parë kurrë toka, e cila i shpërndan ato midis klaneve të veta, varfëron dhe mjeron çdo ditë shqiptarët. Ne, po paraqesim para shqiptarëve një program, i cili i jep përgjigje emergjente kësaj situate varfërie të frikshme, e cila largon shqiptarët çdo ditë, çdo natë nga Shqipëria. Mendoj se, këto janë faktorët të cilët shumë njerëz duan ta quajnë vitin 2024 si vitin e opozitës, por ne preferojmë të quajmë si vit të opozitës vitin 2025, vitin e fitores sonë.
